هی جار مکن!

جَهرِ کِی وست

خين کِی رهسست؟

اَير  مَهند يه تُک خين

 ز سوز اِی سرما به مِنه لاش مو  ماسست

ز اوسو که چوقای وَرُم ، بيرق ايلُم

جامَند به مِنه گَنجه و پيسست

زونُم  که به تيزی اِگُدی يه تَرکه ماره

هر فی که يجا ظلمی اِديد ز جا اِفيچست

از همسوکه سرپوش نهادن به سر شيرعليمردون

خواستن که زيادمون به روه   ياد بزرگون

نادِن به سرس يه شيربردی

داغی به سر زون مو نادِن دِی خوو بنير  داغی و دردی

زونُم به تَه دون دی ديسست

 **************

چن  وخته نيَشنُم  موصدا  برنو و پين تير

که هرفی اِغُرمنی

اِز ترس صداس شير و پلنگ بید که اِرُمِست

دَم دون تفنگانه  بگُو وا دست کی گِهرست

که  او پازن کَل پير

وُرگشت به مِنه ری موخندست

****************

چند وخته که گُلنار مونيدُم که بخونه

مينانه دِراَوُرد زسر و بُريد پلانه

از وقتی که ميشکال نکرد هف به منه ساز

هميلای دی  نبازست

مستی زسر دُرگَل و کُريَل همه پهِرست

****************

گوگريو کُنه کوگ منه تاراز

با  سيکه و ناله

َسروَنده  به زِر  يه دشت لاله

سی درد دل مو خين گريوست

سنگينی برف نهله  دِرا  کِلوس و کنگر

رِهواس دی تهلست

****************

کَندن به سرِ وارگه ها دال و غلايل

از همسو که اَو وَست به زِربهون دالو

زُون بسته چقد غارنی

که اِمداد پيايل

کو دالو ؟

هم دالو که مِن  جنگ

هر فی که ِازيد کِل  کُه اِرُهمست

هيشکی نورستاد   و    رگ هيشکی نجُمست

 ****************

دِهرست  به سر پنجه  و   دندون زمونه

ِاشکم  همه  ميشونم و  بزگَل

بُهدنگ نشستی! جغله بزن يه گاله

همطو که اِخوندی  سی دلت  بيت بلاله

ار راست اگهی که چو بازی

برو  دوِ    زمونه

رنگت منی   بُهرست ! ؟

زُونت سيچه  گِهرست !؟